سكر الحمل .. ما هو والأسباب والمضاعفات وطرق الوقاية
سكر الحمل مرض السكر فى حد ذاته طبعا من الأمراض الشهيرة جدا , اللى مفيش حد تقريبا ميعرفهاش , اها فيه نسبة كبيرة من الناس فاهمينها غلط , أو معلوماتهم فيها ناقصة , انما ده ميمنعش ان مرض السكر مرض الكل تقريبا يعرفه !!
لو اتكلمنا عنه فى نبذة مختصرة , ممكن نقول انه مرض بيحصل لما البنكرياس مينتجش أنسولين أصلا , وده سكر النوع الأول , أو ينتج أنسولين بكمية قليلة عن حاجة الجسم , أو ينتج أنسولين الجسم ميستفيدش بيه نتيجة مقاومة الأنسولين , ودول حالات سكر النوع التانى .
ما هو سكر الحمل
طيب ده مرض السكر نفسه , يطلع ايه بقى سكر الحمل ؟؟
سكر الحمل ببساطة هو ارتفاع سكر الدم عند الحامل , نتيجة الحمل , تحديدا مع بداية الشهر الخامس من الحمل , ورجوعه لمستواه الطبيعى بعد الولادة .
طيب ليه ؟؟
المفروض ان المشيمة بتفرز هرمونات , هرمونات المشيمة طبيعتها انها بتقلل فاعلية هرمونات البنكرياس اللى بتتحكم فى سكر الدم , أو ببساطة بتقلل فاعلية الأنسولين بتاع الأم الحامل.
ده عادى وطبيعى وبيحصل فى كل الحوامل , طيب ليه فيه حامل بيجيلها سكر حمل , وحامل تانية مبيجيلهاش ؟؟
لأن الطبيعى برضه ان البنكرياس لما يلاقى ان هرمونات المشيمة بتقلل من تأثير هرموناته , بيعوض هو الفرق ويزود افراز هرموناته , فيفضل مغطى حاجة الجسم منها , ده الطبيعى .
فى حالة سكر الحمل بقى البنكرياس مبيقدرش يعمل كده , يعنى بتفضل هرموناته بنفس مستواها ومبيعرفش يزودها , فبالتالى هرموناته دى مبتكونش كافية لضبط مستوى السكر عند الحامل , فتصاب بسكر الحمل .
أسباب سكر الحمل
طيب ايه العوامل أو الأسباب اللى ممكن تخلى الست تصاب بسكر الحمل ؟؟
- زيادة وزن الحامل السابقة على الحمل.
- اكتساب الحامل لوزن اكتر من الطبيعى أثناء الحمل.
- وجود مقدمات السكر عند الحامل قبل الحمل , يعنى الحامل قبل الحمل كان عندها مقاومة انسولين وكانت بتشاور عقلها فى انه يجيلها سكر.
- قلة حركة الحامل.
- وجود تاريخ عائلى لمرض السكر عند الحامل , وهنا اقصد سكر النوع التانى , يعنى يكون حد من اقارب الحامل عنده سكر نوع تانى بالذات لو قريب من الدرجة الأولى.
- ولادة الأم السابقة لأطفال وزنهم كان أعلى من 4 كيلو وقت ولادتهم.
- اصابة الحامل بتكيس المبايض.
- كبر سن الحامل.
- وجود تاريخ مرضى سابق لأصابة الحامل بسكر الحمل فى مرات الحمل السابقة.
أعراض سكر الحمل
طيب ايه الأعراض اللى ممكن تلفت نظر الحامل ان عندها سكر حمل ؟؟
فى أغلب الحالات مبيكونش فيه أعراض واضحة لسكر الحمل , يعنى نسبة كبيرة من الحوامل اللى مبيتابعوش الحمل, ممكن جدا يبقى عندهم سكر حمل وميعرفوش انه عندهم , وزمان كانت ممكن الأم تحمل وتولد كذا مرة , ويجيلها سكر حمل فى كل مرة , وهى متعرفش انه كان بيجيلها سكر حمل , وحتى لما بتحصل أعراض , المرأة بتربطها بالحمل نفسه , وتعتبرها طبيعية , زى مثلا :
- الشعور بالعطش.
- جفاف الفم.
- زيادة مرات التبول.
- الشعور بالجوع.
- الأصابة بالألتهابات المهبلية والتهابات مجرى البول.
- الشعور بالغثيان والقىء.
- زيادة الأستعداد للعدوى بأنواعها وخاصة عدوى الجلد والأسنان.
تشخيص سكر الحمل
طيب , كده مفيش اعراض واضحة ممكن المرأة الحامل تستغربها وتخليها تشك ان ده سكر حمل , طيب تعمل ايه علشان تعرف اذا كان عندها سكر حمل وللا معندهاش , التشخيص يعنى بيكون ازاى؟
- ببساطة بالمتابعة وقياس السكر بشكل دورى مرة شهريا على الأقل .
- اجراء ما يعرف باختبار تحمل السكر , وده ببساطة بيتم بأننا بنقيس السكر , وبعدين ندى الشخص ده كمية من شراب سكرى , ونتابع سكرها بعده بساعة كاملة , اذا طلع عالى بنعملها اختبار تحمل الجلكوز زيادة تأكيد , وده بيتم بأن المرأة بتروح للمستشفى صايمة , يتقاس سكرها صايم , بعده بنديها محلول سكرى تشربه , ونقيس سكرها بعده بساعة , وبساعتين , وبتلت ساعات , اذا كان اعلى من الطبيعى بتتشخص كحالة سكر حمل .
مضاعفات سكر الحمل
طيب , واحدة من حضراتكم هتقولى , طالما سكر الحمل بيختفى من نفسه بعد الولادة وخروج المشيمة , ما نسيبه , ايه أهمية اننا نشخصه ونعالجه , هو له مضاعفات مثلا لو متعالجش ؟
أها طبعا له مضاعفات , على الأم وعلى الجنين :-
- اصابة الأم بتسمم الحمل بكل مضاعفاته وكوارثه المشهورة.
- زيادة حالات الولادة المبكرة وموت الأجنة فى رحم الأم.
- زيادة الأستعداد لمشكلات الكلى عند الحامل وامكانية تاثيرها على وظايف الكلى .
- زيادة حالات الحاجة للولادة القيصرية الطارئة .
- تعرض الأم لمشكلات الولادة زى غزارة النزف أثناء الولادة ونزيف ما بعد الولادة .
- اصابة الأطفال بعد ولادتهم بمشكلات التنفس ومشكلات الجهاز العصبى .
- زيادة احتمالات وفاة المواليد .
- زيادة احتمالات اصابة الأطفال دول بسكر النوع الثانى بعد ما يكبروا .
- اصابة الأم بسكر النوع الثانى , معظم اللى بيجيلهم سكر حمل , بيجيلهم بعد كده سكر نوع تانى.
يعنى سكر الحمل , مهواش حاجة هايفة ممكن نتجاهلها ونسيبها بدون اكتشاف ولا علاج عادى , زمان نسبة كبيرة من الستات كانت بتكرر عندهم حالات الأجهاض ووفيات المواليد بسبب سكر الحمل وهما ميعرفوش , ومكانش عندهم تفسير واضح لسبب تكرار اجهاض الست دى , أو وفاة مولودها بعد ولادته أو خلال أيام من ولادته , وكانوا بيعتبروه قضاء وقدر !!
الوقاية من سكر الحمل
طيب , بما ان سكر الحمل حاجة خطيرة بالشكل ده , هل ممكن نتجنبه أو نقلل فرصة حدوثه , يعنى هل ممكن الوقاية منه ؟
اها طبعا ممكن نتبع سبل الوقاية :-
- الحرص على الدخول للحمل بوزن صحى , مش زايد .
- الحرص على الحركة أثناء الحمل وأبسط صورها المشى نصف ساعة كل يوم .
- الحرص على عدم زيادة الوزن بشكل اعلى من الطبيعى خلال الحمل , يعنى نقلع عن نظرية (انتى بتاكلى لأتنين)!! مفروض ان الحامل بتزيد أثناء الحمل من أوله لآخره , من 12 الى 15 كيلو !! ده خلال التسع شهور مش كل شهر علشان نبقى واضحين !!
- التغذية الصحية اللى قوامها البروتين والخضروات والفواكه والمكسرات والأسماك الدهنية ومنتجات الألبان والمياه , مش المعجنات والحلويات والمخلالات والفاست فود والمعلبات !!
- متابعة الحمل طبيا طوال فترة الحمل , علشان لو ظهر سكر الحمل يكتشف ويتم التعامل معاه .
علاج سكر الحمل
طيب لو حامل اكتشف طبيبها ان عندها سكر حمل , ايه العلاج اللى ممكن يتم فى الحالة دى ؟
- فى البداية بتلتزم الحامل بنظام غذائى وحركة يومية وتتابع السكر , والله انتظم السكر بالشكل ده يبقى خير وبركة, محصلش بنلجأ للخطوة التانية.
- العلاج الدوائى , بمعرفة واشراف الطبيب المعالج مع متابعة السكر والتأكد من ضبطه.
- متابعة السكر بعد الولادة للتأكد من عودته للمستوى الطبيعى.
- متابعة السكر وتجنب عوامل زيادته مدى الحياة تجنبا لسكر النوع التانى اللى أى واحدة أصيبت بسكر الحمل , عندها استعداد عااالى جداااااااااا للأصابة بيه .
تحياتى
الدكتورة لوجى
اخصائى طب النساء والتوليد
فريق عمل دكتور كشكول
روشتات طبية | نصائح دكتور كشكول | انفوجراف طبي
دكتور كشكول || فيديوهات طبية كرتونية
لمتابعة جديد فيديوهات دكتور كشكول : أضغط هنا
ينصحك دكتور كشكول بمتابعة
تعليقات
إرسال تعليق