إدمان الألعاب الألكترونية قد يؤدى للأنتحار
إبليس , الله يلعنه , يوم القيامة , بيتبرأ من أتباعه , ويقول ببساطة (أنا مغصبتهمش ولا ضربتهم على إيديهم , هما اللى عصوا ربنا بإرادتهم الحرة ) !!
وده للأسف , صحيح , إبليس بيدل الشخص على سكة المعصية , لكن الشخص بيعملها بكامل إرادته وهو عارف كويس إنها معصية !!
فيه شاب عمره 28 سنة , ساكن فى حى الساحل , فى القاهرة , بيشتغل سائق فى شركة أتوبيسات , إنتحر , حاول يقطع شرايين ايديه , معرفش , طيب شرايين رجليه , معرفش برضه , فقفز من الدور الرابع , والمرة دى نجح أخيرا , ومات فعلا !!
ليه بقى ؟؟
لأنه خسر مبلغ 50 الف جنيه , فى لعبة مراهنات إلكترونية , فإكتأب وانتحر !!
من سنتين تقريبا , إنتشرت بين المراهقين والشباب لعبة إسمها الحوت الأزرق , اللعبة فكرتها إنها بتدخل الشاب فى سلسلة من التحديات الصعبة , بتنتهى بتحدى إنه يكون عنده شجاعة الإنتحار , ببساطة بيتنقل اللاعب من تحدى للى بعده , ومن مستوى للى بعده , لغاية ما يوصل لأعلى مستوى , يقابل الوحش يعنى !!
بتطلب من اللاعب إنه ينتحر , يموت نفسه , والحقيقة شباب كتير ابتداء من 11 سنة وطالع لغاية العشرينات , طلعوا شجعان فعلا , وانتحروا !!
لعبة بابجى الشهيرة , اللى تقريبا بقت صيحة العصر ومش هكون ببالغ لو قلت إن مفيش مراهق ولا شاب فى مصر مبيلعبهاش , ده حتى الكبار اللى سنهم 40 و50 سنة , هما كمان بيسايروا الموضة ويلعبوها من باب مواكبة التطور وإنهم ميبقوش دقة قديمة !!
اللعبة دى بتخلى اللاعب يدمنها حرفيا , يبقى طول الوقت بيلعبها , ممكن لا ياكل ولا يشرب ولا ينام ولا يذاكر ولا يشتغل ولا يخرج من أوضته أصلا , فى سبيل إنه يلعبها , وممكن اللاعب يلعبها من خلال فريق كمان ويلعبوها كمجموعة !!
غير بقى مصيبة اللعبة دى , فى إنها ببساطة مضيعة لعمر اللى بيلعبها , لأنه ممكن يبتدى لعبها وهو ابن 12 سنة , يفضل يلعبها لغاية ما يفاجأ إنه بقى 20 سنة مثلا من غير ما ياخد باله ولا يتقدم فى حياته خطوة واحدة دا إن متأخرش!!
كمان اللعبة دى بقى , تسببت فى وفاة كذا طفل وشاب , بالسكتة الدماغية , نتيجة الضغط العصبى والإنفعالى الرهيب , اللى بيتم على اللاعب أثناء اللعب , المسألة بالنسبة له طول الجيم بتبقى مسألة حياة أو موت , وأحيانا بتنتهى بإن أحد الأوعية الدموية لمخة ينفجر من شدة ارتفاع الضغط , فتبقى مسألة موت , ويدخلوا عليه أهله يلاقوه متوفى والموبايل فى ايده !!
لمتابعة جديد روشتة دكتور كشكول : أضغط هنا
على من تقع المسئولية ؟
طبعا لما حضراتكم تسمعوا الكلام ده , كالعادة , هتلعنوا وتسبوا فى الألعاب دى , ومصمميها , والحرب الشرسة اللى بنتعرضلها ونظرية المؤامرة و……………. !!
طيب , وهما يعنى اللى صمموا الألعاب دى وغيرها , أيا كان هدفهم , كانوا غصبونا نلعبها مثلا !!
وللا أحنا اللى على مدار عقود كاملة , ساعدناهم يحققوا أهدافهم دى , لما بقي أغلب شبابنا سطحى إلى درجة التفاهة , منعدم الثقافة إلى درجة الجهل برغم إن أغلبه حاصل على مؤهلات عليا , رافض لكل القيم والمبادىء لأنه شايف الحياة بدونها أسهل , عايش بدون هدف ولا شعور بقيمة الذات لدرجة إنه بقى كل هدفه إنه يثبت نفسه فى (لعبة الكترونية) , بعيد عن القيم الدينية لأنه إما ملقاش اللى يعلمهاله أصلا أو لقى اللى يعلمهاله غلط فهرب منها ومن الدين على بعضه !!
دور الأهل فى حماية الأبناء من خطر الألعاب الإلكترونية
يا جماعة , الحقوا ولادكم , ولادكم وصلوا إلى درجة إنهم بينتحروا لما لعبة إكترونية تطلب منهم الأنتحار , وبييجيلهم سكتة قلبية ودماغية من شدة خوفهم من خسارة جيم فى لعبة إكترونية , مبيجيلهمش من شدة خوفهم من رسوبهم فى الأمتحان ولا من فقدانهم لشغلهم ومصدر أكل عيشهم ولا حتى من فقدانهم لأسهرهم وأولادهم !!
أرجوكم , ربوا ولادكم صح , دوركم مش إنكم تجيبوا لولادكم فلوس يعيشوا بيها وبس !!
تنشئة الأبناء على القيم السليمة هو وسيلة الحماية
عرفوهم إن العلم قيمة , والوقت هو وحدة تكوين العمر , وإن الأخلاق والمبادىء مش موضة قديمة ولا وسيلة لتعقيد الحياة دى وسيلة الحياة نفسها , وإن الرجولة مش سيجارة وسلسلة ودوجلاس وعلو صوت وألفاظ خارجة وإدمان مخدرات وفرد عضلات , الرجولة تحمل مسئولية وتمسك بمبدأ !!
والأمومة والأبوة مش مجرد القدرة على إنجاب أطفال , مش حمل وولادة , الأمومة تربية وتعليم واحتواء وقدوة للأطفال دول ورقابة واعية تثبت الصح وتقوم الغلط !!
لمتابعة جديد فيديوهات دكتور كشكول : أضغط هنا
الإستخدام الصحيح للتكنولوجيا ووسائل التواصل
النت وسيلة للعلم والثقافة وتنمية المهارات , مش وسيلة للعب والفرجة على فيديوهات خارجة وتضييع الوقت فى أى رغى والسلام .
و الموبايل فون وسيلة إتصال , أو وسيلة ثقافة أو وسيلة إدارة مصالح وأعمال, مش مجرد لعبة إلكترونية ولا وسيلة إنحراف بشكل أو بآخر!!
رقابة الأهل لإستعمال الأبناء للأجهزة الإلكترونية ضرورة
متجيبش لأبنك الموبايل أو الكمبيوتر وتنساه , وتسيبه منه له , وإنت أصلا مش فاهم ولا مستوعب هو بيعمل بيه إيه وتقول أهو بيلعب !!
إنت كده رميته فى البحر من غير ما تعلمه السباحة , فى وقت نوة !!
إديت سكين حامية لطفل ابن تلت سنين , من غير ما تعلمه يستعملها إزاى ولا يستعملها فى إيه ولا مخاطرها إيه !!
الجهاز ده ممكن يحوله لفاشل أو منحرف أو مدمن أو شاذ أو مريض نفسى أو جاسوس أو إرهابى أو على الأقل لإنسان جاهل سطحى تافه معندوش فكرة عن أى حاجة فى الحياة !!
وبرضه ممكن يحوله لأديب أو مفكر أو عالم أو كاتب أوفنان أو داعية أو إعلامى أو رجل أعمال أو رياضى أو تاجر أو على الأقل لشخص واعى مثقف مدرك للى بيدور حواليه .
وكلامى ده يسرى على الجنسين , ولاد وبنات !!
لازم نركز كويس فى تأثير الأجهزة دى على صحتنا وحياتنا وسلوكياتنا وقيمنا ونظرتنا للأمور وحتى طريقة كلامنا على مستوى جميع الأعمار , ما بالنا بأطفال أو مراهقين !!
للإستشارات الطبية المجانية | دكتور كشكول
نحن مشتركون فى مسئولية تعرض النشء لخطر إدمان الألعاب الإلكترونية
بلاش نحمل غيرنا مسئولية أخطائنا إحنا , إحنا اللى نسينا نربى ولادنا وسبناهم لغيرنا يربيهم , فمش لازم نتضايق لو طريقته فى تربيتهم معجبتناش !!
ببساطة , إلحقوا ولادكم , وإلا لما يضيعوا بشكل أو بآخر , متلوموش غير أنفسكم !!
تحياتى
الدكتورة سمسمة
إستشارى باطنة عامة
فريق عمل دكتوركشكول
تعليقات
إرسال تعليق